Египетке болгон иш сапарында Дин иштери боюнча мамлекеттик комиссиясынын директору Тойгонбай Абдыкаров, Кыргызстан мусулмандарынын дин башкармалыгынын башчысы Замир Ракиев жана Кыргызстан Ислам университетинин ректору Абдишүкүр Нарматов ал -Азхар эл аралык университетинин башкы жетекчиси Шайхул-Азхар, Азхару Шарифтин шайхы, дин аалымы, профессор, доктор Ахмад Тоййиб менен жолугушуп, эки тараптуу кызматташуу жолдорун талкуулашты. Ошондой эле Египет Араб Республикасынын президентинин кеңешчиси, белгилүү дин аалымы Усама аль-Азхарий менен да жолукту. 

Иш сапардын алкагында атайын ал-Азхар университетинде окуп жаткан кыргызстандык студенттер менен жолугушуулар уюштурулуп, КР ДИМКнын директору Тойгонбай Абдыкаров Кыргызстандагы дин эркиндигине токтолуп, бөтөн жерде мекенибиздин күзгүсү болгон жаштарга терс жолдорго барбай, өз маданиятыбызды, каада-салтыбызды сактоого жана салттуу ханафий мазхабын бекем карманууга, экстремисттик көз караштардан алыс болууга чакырды.